1Th 3 | KPG | STEP | Gimaadou gu deemee di hagakono di noho mogowaa mo goodou, gei gimaadou ga hagamaanadu bolo gimaadou ga noho hua mada gimaadou i Athens,

a 3.1:Acts 17.15

b 3.6:Acts 18.5

1 Thessalonians 3

1 Gimaadou gu deemee di hagakono di noho mogowaa mo goodou, gei gimaadou ga hagamaanadu bolo gimaadou ga noho hua mada gimaadou i Athens, ^a 2 i di madagoaa gimaadou ne hagau adu tadau duaahina go Timothy dela nogo hai hegau gimaadou gi God e agoago di Longo Humalia di hai o Christ. Gimaadou ne hagau adu a mee belee hagamaaloo aga goodou, ge e hagamaamaa godou hagadonu, 3 bolo gi dee huli gi muli tangada e dahi idimaa go nia hagaduadua aanei. Goodou gu iloo hua bolo nia hagaduadua aanei la di mee ni God mai gi gidaadou. 4 Di madau madagoaa nogo noho i godou baahi, gimaadou gu hagi adu i mua di madagoaa bolo gidaadou ga tale gi nia hagaduadua, gei goodou gu modongoohia bolo gu hai. 5 Deelaa tadinga dagu hagau adu Timothy. Au gu deemee di talitali, ga hagau adu a mee, bolo gi iloo eau di godou hagadonu. E deemee di hai bolo Satan gu hagamada goodou, gei madau hegau ala nogo hai i godou baahi, la ga balumee hua. 6 Dolomeenei, gei Timothy gu gaamai di longo haga tentene o godou hagadonu mo aloho. Mee gu helekai bolo goodou e mamaanadu huoloo i gimaadou, gei goodou e hiihai huoloo bolo goodou e heetugi mai gi gimaadou, gadoo be di madau hiihai. ^b 7 Malaa, madau duaahina nei, i lodo madau haingadaa mo madau hagaduadua huogodoo, gimaadou e maaloo huoloo, idimaa, ma go godou hagadonu ala ne hagamaaloo aga gimaadou. 8 Idimaa, dolomeenei gimaadou gu mouli, maa goodou ga hagamau dangihi godou mouli buni ang gi tadau Dagi. 9 Dolomeenei gimaadou gu mee hua di danggee ang gi God i goodou. Gimaadou e danggee gi mee, idimaa gimaadou gu tentene i mua o maa, idimaa go goodou. 10 Boo mo aa, gei gimaadou e dangidangi ang gi mee gi dugua mai tadau madagoaa e heetugi, gei e hagamaamaa goodou i nia mee ala e dee dohu i godou hagadonu.

11 Damana go God mo tadau Dagi go Jesus gi hagatogomaalia ina di ala dela e lloo adu ai gimaadou gi goodou! 12 Tagi gi heia godou hagadau aaloho mo godou aloho i nia daangada huogodoo gi tomo gi nua, gadoo be madau aloho i goodou. 13 I di ala deenei, mee ga hagamaaloo aga godou manawa gi dohu dogomaalia ge e dabuaahia i baahi God Tamana, i di madagoaa tadau Dagi Jesus ma ga hanimoi mo ana daangada huogodoo.